ચંદ્રને શાપ અને ગણેશ ચતુર્થી

એક વાર ગણેશ ચતુર્થીની રાત્રે ગણેશજી ભક્તોએ ધરાવેલા ઘણા મોદક આરોગીને મૂષક પર બેસીને જતા હતા. રસ્તામાં મૂષક ઠોકર ખાતાં ગણેશજી નીચે પડી ગયા.

આકાશમાંથી આ દૃશ્ય જોઈને ચંદ્રદેવ પોતાના રૂપના અભિમાનમાં હસી પડ્યા. ગણેશજીએ ચંદ્રને શાપ આપ્યો કે જે તારાં દર્શન કરશે તેના પર ખોટું કલંક લાગશે.

ચંદ્રે ક્ષમા માગી ત્યારે ગણેશજીએ શાપ હળવો કર્યો — માત્ર ભાદરવા સુદ ચોથ (ગણેશ ચતુર્થી)ની રાત્રે ચંદ્રદર્શનથી દોષ લાગશે. આ જ કારણે તે રાત્રે ચંદ્ર ન જોવાની પરંપરા છે. કથા મુજબ ભગવાન શ્રીકૃષ્ણ પર પણ આ દિવસે ચંદ્રદર્શનને કારણે સ્યમંતક મણિની ચોરીનું ખોટું કલંક લાગ્યું હતું.

દર મહિનાની વદ ચોથને સંકષ્ટી ચતુર્થી કહે છે, જ્યારે ભક્તો ઉપવાસ કરીને ચંદ્રોદય પછી ગણેશજીની પૂજા કરે છે.